नेपाल चलचित्र निर्देशक समाजको १८औँ वार्षिक साधारण सभा तथा चुनावी अधिवेशन नजिकिँदै जाँदा निर्देशकहरूको चुनावी माहोल तातिएको छ । यही क्रममा अध्यक्ष पदका उम्मेदवार अरुण कुमार प्रधानको नेतृत्वमा ‘टिम अरुण’ले आफ्नो प्रतिबद्धतासहित चुनावी अभियानलाई तीव्र बनाएको छ ।
टिमले “सशक्त निर्देशक, समृद्ध नेपाली सिनेमा” भन्ने नारासहित निर्देशक समाजलाई व्यवस्थित, डिजिटल र जिम्मेवार बनाउने प्रतिबद्धता व्यक्त गरेको छ । साथै निर्देशकहरूको सम्मान, उद्योगको पुनर्जागरण, पहिचान, प्रवर्द्धन र संरक्षणमा आफूहरू प्रतिबद्ध रहने उल्लेख गरिएको छ ।
टिम अरुणले व्यवसायिक, पारदर्शी र अन्तर्राष्ट्रियस्तरको निर्देशक समाज निर्माण गर्ने लक्ष्य लिएको बताएको छ । “एकता, सम्मान र सिर्जनशीलताको साझा अभियान” तथा “नयाँ सोच, नयाँ गति, नयाँ निर्देशक समाज” भन्ने अवधारणालाई समेत अघि सारिएको छ । प्रस्तावित चलचित्र विधेयकमा निर्देशक मैत्री चलचित्र विधेयक निर्माण गर्न सशक्त र जिम्मेवार योगदान रहने प्रतिबद्धता पनि टिमले प्रष्ट पारेको छ ।
अरुण कुमार प्रधान अध्यक्ष पदका उम्मेदवार हुन् भने महासचिवमा समुद्र भट्ट, वरिष्ठ उपाध्यक्षमा शुभाष गजुरेल, उपाध्यक्षमा दीपक वली, सचिवमा राज बहादुर साने, कोषाध्यक्षमा उत्सव के.सी. र सह–कोषाध्यक्षमा भिम तामाङ उम्मेदवार रहेका छन् । सदस्य पदमा लक्ष्मण सुनार, यम शेर्पा र सागर केरुङ मैदानमा छन् ।
टिम अरुणले नेपाली चलचित्र उद्योगलाई थप सशक्त, सिर्जनशील र व्यवस्थित बनाउने उद्देश्यसहित आफूहरूको उम्मेदवारी आएको जनाएको छ ।
