काठमाडौं :
सिनेमा ‘द ब्ल्यू लाइट’ निर्माणको घोषणा गरिएको छ। मंगलबार निर्माणपक्षले थिम पोस्टर सार्वजनिक गर्दै सिनेमा निर्माणको घोषणा गरेको हो।
‘द ब्ल्यू लाइट’लाई बलिराम चौहानले निर्देशन गर्नेछन् । चौहान अहिलेको प्रतिक्षित सिनेमा ‘बलिदान’को लेखक तथा मुख्य सहायक निर्देशक हुन्। चौहानको यो डेब्यु निर्देशन हो। स्काइफल पिक्चर्सको प्रस्तुति रहने ‘द ब्ल्यू लाइट’को को–प्रोडुसरको रुपमा रमन ग्रे रहनेछन्। ‘द ब्ल्यू लाइट’लाई नरेन्द्र मैनालीले खिच्नेछन्।
‘द ब्ल्यू लाइट’ सन् २०२५ भित्रै रिलिज हुने निर्देशक चौहानले बताएका छन्। सिनेमाको थिम पोस्टरमा नामजस्तै निलो कलरको बीचमा एक बालिका उभिएकी छन् । उनको शरीरको कम्मरदेखि माथिको पछिल्लो भाग देखिन्छ। जुङरुङ्ग कपाल छ। उनको अगाडि निलो कलर छ। निलो बादलजस्तो पनि देखिन्छ। बालिकाको गेटअप र अवस्था हेर्दा उनी विछिप्त हुन् कि भन्ने सामान्य अनुमान लगाउन सकिन्छ। तर, प्रष्ट छैन।
निर्देशकले थिम पोस्टरले भन्न खोजेको के हो, सिनेमाको कथा के हो प्रष्ट पारेका छैनन्। उनले कलाकारबारे पनि केही जानकारी दिएका छैनन्। केही समयपछि कलाकारको लाइनअप सार्वजनिक गर्ने निर्देशक चौहानले बताएका छन्।
उनले भने,‘हामी विस्तारै चलचित्रबारे थप जानकारी दिँदै जानेछौँ । कलाकारका लागि पनि केहीसँग कुरा भइरहेको छ, फाइनल भएपछि जानकारी दिन आउने छौँ । अहिले बनारमा नाम चलेका प्रमुख कलाकारहरू नै हाम्रो सिनेमामा हुनुहुनेछ।’
